खोप प्राथमिकतामा नराख्नु दुखद

खोप प्राथमिकतामा नराख्नु दुखद

 कोभिड १९ को महामारीको समयमा समेत उद्योगधन्दा संचालन गरी राष्ट्रिय राजश्व निर्माण, रोजगारीलाई निरन्तरता दिइरहेका उद्योगी व्यवसायीहरु राज्यको खोप कार्यक्रममा प्राथमिकतामा नपरेको भन्दै उद्योगी व्यवसायीहरुले असन्तुष्टि जनाएका छन् ।

नेपाल उद्योग बाणिज्य महासंघ प्रदेश १ ले खोपको प्राथमिकतामा उद्योग व्यवसायीहरु नपरेको भन्दै प्रदेश १ सरकारका मुख्यमन्त्री शेरधन राईलाई खोपको व्यवस्था मिलाइदिन लिखित आग्रह नै गरेको छ ।

राज्यले कोभिड १९ भाइरसको महामारीविरुद्ध संचालन गर्ने खोप अभियानमा उद्योगी व्यवसायी तथा त्यस क्षेत्रका कर्मचारीहरुलाई पहिलो प्राथमिकतामा राख्न माग गरेको हो । महासंघ प्रदेश १ का अध्यक्ष टिकाराज ढकालले मुख्यमन्त्री राईलाई खोपको व्यवस्थाका लागि आग्रह गरेका हुन् ।

दोश्रो भेरियन्टको कोरोना संक्रमण तिव्र गतिमा फैलिरहेको अवस्थामा महासंघले उद्योग व्यवसाय, बजार बन्द गर्नु पर्ने बाध्यात्मक स्थिति उत्पन्न भइरहेको, दैनिक रोजगारी गरेर आफ्नो परिवारको गुजारा गरिरहेका हजारौं कामदारहरुको अवस्था नाजुक हुँदै गएको भन्दै चिन्ता व्यक्त गरेको छ ।

औधोगिक क्षेत्रले क्षमता अनुसारको उत्पादन गर्न नसक्दा अति आवश्यक वस्तुहरुको अभाव खड्किन थालेको, उत्पादित वस्तुहरु पनि गोदाम मै थन्क्याएर बस्नु परेको, सरकारले समयमै कर, राजश्व बुझाउन तथा बैंकहरुले बैंकको व्याज तिर्न दवाव दिइरहेको अवस्थामा उद्योगी व्यवसायी नै खोपबाट बंचित हुनुपरेको महासंघले उल्लेख गरेको छ ।

‘जसले राष्ट्रको राजश्वदेखि आम उपभोक्ताको आवश्यकतालाई पूरा गरिरहेको छ, उसलाई प्राथमिकता नराख्नु दु:ख लागेको छ’ महासंघले भनेको छ ।

यस्तो अवस्थामा कोरोनाविरुद्धको भ्याक्सिन (खोप) लगाउने क्रममा राज्यले स्वास्थ्यकर्मी, सुरक्षाका निकायलगायतका क्षेत्रलाई मात्रै प्राथमिकतामा राखेको भन्दै उद्योगी व्यवसायी तथा त्यस क्षेत्रमा काम गर्ने कामदारहरुलाई खोप उपलब्ध गराउन महासंघले माग गरेको छ ।